'E primma matina…

‘E primma matina

sta casa me sembra Resina.

Si cirche mallarde,

truove sulo mappine

e si è tarde

‘o cazettino..

chi ‘o ssà

quanno ‘o truove!

Uno è dint’a na scarpa,

ll’ato starà sott’o lietto

o è n’atu dispietto

‘e chille ca faie.

E intanto t’’a ride

e io gira p’’a casa

cercanno ‘o cazone

levanneme ‘a cuollo

‘o pigiamo d’’a notte.

Ma guarda nu poco!

Sta dint’ a sta sporta

accasato cu ‘e libbre.

Meno male

ca se sente l’addore ‘e cafè!

L’haie già fatto?

Vene a vascio!

E io quase m’accascio

guardanneto, oj ne.

Dint’’o lietto

se sta meglio ca fore

Quanno zuche cunfiette

‘a vita è cchiù doce,

ma Nannina nun senta

o fa finta.

Tene mmane ‘a tazzina

e m’’a poia che coce.

Quanno ‘a guardo

nun tengo cchiù voce,

capisco ch’è tardo.

E’ già llora,

me n’aggio ji.

Gioacchino Ruocco

30/03/2014      Ostia lido

Suspire ‘e miezejuorno