Quanno chiove

Quanno chiove me ne sto chiuso dinto invece d’’e maruzze ca se ne vanno ‘ngiro na vota tanto cu ll’ummete ca cresce. L’acqua ca sta cadenne è proprio tanta c’’a via pare nu rivo. Stu tiempo pe corrivo 'nn ’a vo’ fernì. E n’aucelluzzo tutt’appiciuto sta ‘ngiro ‘a stammatina pe mangià. I’ ca nun t’aspetto pecchè nun viene cchiù, giro pe dint’’a casa sperduto ‘nmiez’’e libbre ricorde ‘e giuventu, cercanno qualche cosa ca nun trovo. So’ ‘e nove, ma, quanno chiove, pare n’eternità. E ‘o cielo chino ‘e nuvole nun saccio che vo' fa. Appena smette n’attimo vulesse ascì d’’a casa ma po’ sempe cchiù forte chest’acqua sta a venì. E ‘a via è na lava che sceppe ‘e prete ‘a terra. Stu tiempo m’arricorda ‘a guerra. Quanta malinconia c’aggia caccià dimane ‘a dint’’a casa mia. Quanno rischiara ‘o cielo voglio fà festa cu chello ca me resta, voglio turnà a campà pecchè cu sta tristezza i’ nun ce saccio stà. Gioacchino Ruocco Ostia lido, domenica 16 maggio 2010, ore 08,50 Inserita nella raccolta "Suspire 'e miezejuorno"