‘O casatiello

E’ tiempo ‘e casatiello.

Pasca è vicina.

Ll’aria se sta accuncianno

chianu chianu.

Aria ‘e campagna,

aria ‘e primavera

ce manca poco

ca già ll’ata sera

te sentette cchiù ddoce

cchiù overa.

Comm’è ‘a ricetta toia ?

Quant’ove tu ce miette ?

Quanta dispiette

Me farraie chist’anno ?

‘O voglio doce

e ‘o voglio nzogna e pepe

e uno ognuno

pe ogne criatura d’’a famiglia.

I’ m’arricorde ancora

‘e ll’ove pinte.

Teresa

ne faceva proprie tante.

e a ognuno ca passava

essa ce ‘o deve

comme a n’aurio

ca esse già teneva.

Ce vonne ‘e braccia

e ‘o core e na pacienza

p’accuntenta ognuno

ca quanno sona ‘a gloria

se senteno felice.

Io comme a sempe

me mangio pane e alice

cu nu poco e nzogna.

Me passa ‘a rogna

d’’a malinconia

e ‘o surzo ‘e vino

me tene cchiù cuntento

e sto pur’io mmiez’a tutta ‘a gente

attuorno

ca me vo’ ancora bbene.

Na fella ‘e casatiello

e penzo a quanno

ero guaglione.

Ne so’ passate ‘e anne !

Nun te n’adduono

Mentre te guardo

e tu me tiene ‘a mano

scurnosa ‘e n’atu vaso

appriparato ?

Gioacchino Ruocco

Ostia Lido    19/03/2014

Inserita nella raccolta "Poesie a ll'acqua 'e rose"