‘O spasso d’’o viento

‘O spasso d’’o viento s’o’ ‘e carte,

‘e pampuglie, nu ciore, na foglia.

Tutt’‘e ccose ca se ne porte

quanno arape 'a porta e fa na currente

ca pure ‘e penziere se piglia e se porte.

Quanno dint’’a na sporta

nun resta cchiù niente

e truove p’’a via

tutte ‘e ccose ca tenive astipate.

So’ ancora de toie

o so ‘e ll’ate

ca s’’e piglieno e portano a casa ?

E accussì già è succieso

ca ire da mia

e mo, mo si ‘e n’ato.

E ogne vota

ca te ‘nconro p’’a via

speruto te gurardo.

Io so’ fatto accussì !

Nun tengo attaccato mai niente

ca basta na refula ‘e viente

e perdo ogni cosa

ca nun s’è attaccata

ncopp’’o muro ‘e sta casa

comme a l’ellera, comme a bardana.

‘A semmana ca trase

ce sta ‘o sole hanno ditto

ea sti ppiante rimaste

na bella arraquata nisciuna ce ‘a leva.

Quanno è ‘a sera

e ‘a trisezza è cchiù nnera.

nun te veco

e  c’’o chianto ‘int’’o core

me pare c’’a more, ma nun voglio murì.

Ogne fronna comme a n’ombra ca passa

é sultanto n’aceno ‘e tiempo

ca ritorna addò ‘o tiempo se spassa

Cu ‘e ccose ca tornano arreto

E cu esse appripara n’atu juorno na pianta

o na bella guagliona.

Gioacchino Ruocco

09/03/2014  Ostia Lido

Inserita nella raccolta “Suspire ‘e miezejuorno”