High tea

Pecchè sta voglia ‘e te
accussì forte
quanno m’invite a me piglia nu te ?
M’aspiette
e io me piglio ‘o tiempo mio
assapuranno
tutte ‘e fantasie
c’’o core mette nnanze
pure si vengo
sulo pe te vedè.
Che d’è nu te
ca nun è nu cafè ?
E’ ‘a gioia ardente
‘e sta nzieme cu te,
guardarte dint’a ll’uocchie
e suspiranno
ncopp’a na tazza
ca sta nnanze ‘a me
senza darte a vedé
ca tu me manche
a tantu tiempo.
Senza aspettà ca tu…
te sto’ cercanno
‘a n’anno
che m’è sembrato
comme a n’eternità.
E chesta scusa
è stata ‘a benvenuta:
vedé ll’amice
pe nu saluto
c’’a tantu tiempo
nun vedevo cchiù.
Te penzo
e te ritrovo
sempe cchiù bella.
Na fella ‘e dolce
nun ce stesse male.
Si ancora tale e quale
a quanno ce hammo lasciate
tu pe n’ata strada
e io pure
comme a doie criature

sperze
‘int’a ll’eternità.

Gioacchino Ruocco
Ostia Lido, 23/02/2013

Inserita nella raccolta "Poesie a ll'acqua 'e rose"

Già pubblicata nei blog
Il gusto dei ricordi
Ruocco Tribu