S’è appiccecato cu ‘o frato

S’è appiccecato cu ‘o frato

e  s’è sfugato cu mme.

Pe nun dà a vedè

c’’o fatto era n’ato.

S'è arravugliato

cu ‘e mmano e cu ‘e piere.

E’ nu mese l’atriere

ca nun campa chi campa

cu na miseria,

cu duie solde

a che l’hanno schifato

e mò ‘o frato

‘o pate e na sora

stanno a careco ‘e isso.

E’ ‘o cchiù rutto

ca porta a tre sane

e dint’’a tiana

ce mette cchiù acqua,

nu pizzeche ‘e broro

e duie pugne ‘e pastine.

Qua mmericine ?

S’’e guarda, s’’e vote

s’’e gire

e se fa sempe cchiù niro.

Nu poco ‘e pacienzia

s’è ditto Vicienzo

sperammo ca passa.

‘a trubbea e stà a spasso

ca ancora cchiù nera

nun se po’ ffà.

Dummeneca ‘a pasta

si resta, si avasta.

Si sta pacienza

nun perde ‘a pacienza.

Daie cunto qualcosa

ca me cagne ‘e penziere.

Sta facenno na cura. Che vuò ?

Te ce miette tu pure.

Dimane nun tene cchiù ‘a panze

Ce pienze.

E’o penziero cchiù nniro

d’’ famma me passa.

Io me faccio cchiù bello!

Chesto é chello che vuo?

‘A miseria  'e sti juorne? 

Ma ‘e che state parlanno!

S’è appiccecato cu ‘o frato.

e s’è sfugato cu mme.

Gioacchino Ruocco

12/03/2014            Ostia Lido

Inserita nella raccolta "Suspire 'e miezejuorno"