'O core e ll’anema

‘O core e ll’anema

Qualcuno dice ca so’ ‘a stessa cose

ma ‘o core ‘o sente ‘e sbattere

e ll’anema ‘nn ’a sento.

Inutilmente cerco dint’a mme

e ‘a capa me fa male a penzà sempe,

a cercà na ragione ca nun saccio,

nu mutivo ca m’ha dda fa campà.

I’ quanno canto sono n’essere felice,

comme a quanno sto cull’amice

redenno e pazzianno.

Ma si ll’anema è quanno tu me dice

ca comme faccio nun va maie bbuono

allora è meglio quanno vene ‘o truono

e me mette paura e cerco 'a mamma.

L’anema sarrà ‘o tiempo perzo,

tutt’’a malincunia ca sento ‘ncuollo

quanno te dico ‘e vvote na buscia

ca nun te piace maie ‘a verità.

Quanno me perdo e so’ penziere amare,

quanno sto ‘nmiez’’o mare e nun te trovo,

quanno ‘int’’o suonno i’ me sento perzo

pecchè nisciuno me vo’ bbene cchiù.

Quanno io te parlo e tu me guardo stuorto,

quanno so’ vivo e già me sento muorto.

Quanno me sento n’anema ‘o priatorio,

quanno ‘e penziere nun ce stanno cchiù,

quanno ‘a gente st’attuorno e nun me penzo.

Ma ll’anema che d’è i’ nun ‘o saccio.

Quanno te guardo ‘nfaccio

e te veco diversa ‘a comme si,

quanno cammino tutta na jurnata

e torno disperato ‘nbracci’a te.

Quanno me guarde

cu ll’uocchie chine ‘e chianto

cchiù disperata ‘e me

cu ‘a miseria ‘int’’e sacche

senza chiù tacche e senza cchiù sole.

‘O core ‘o sente ‘e sbattere

e n’ato ppoco scoppia,

ll’anema nun tena na parola

ca me po' cunzulà…

Ostia lido,   03/05/2010


La poesia è inserita nella raccolta ‘E primma matina
pubblicata in quella più ampia
dal titolo “Turnanno arreto “,
edita a Roma nel 2010