E avanza ancora

I’ che dulore ‘e panza !

E avanza ancora

tanta ‘e chella rrobba

ca p’’o mangià

ce vo’ cchiù ‘e na semmana!

Na vota cucinata

te l’è a magnà pe fforza,

mentre na vota

ive pe lupine e torze

ca ogge sta ricchezza

nun te bbasta cchiù.

Cchiù mmuorto ‘e famma ‘e ogge

nun t’aggio visto maje.

Pare nu maceniello,

pare na vocca ‘e draga.

Quanta cchiù rrobba accatta

tanta cchiù se n’affoga.

E ‘a casa nun arapa

cchiù a nisciuno

e a ‘Onna Sciurella

nun le puorte ‘o ppane.

Ce miette dinto

tanta mulignane sott’uoglio

o fatte a parmiggiana

ca sto facenno

‘a sputazzella mmocca

sulo a ce penzà

ca si me ne tocca na fella

m’agnotta

pe nun m’’a fa arrubbà.

Sparagna

c’’a salute ce guadagne

e ‘o cchiù che tiene

danno nu poco all’ate,

a chi t’è frato o sora

a chi t’ha cuffiato

e te cuffea ancora

ca nun t’avasta maje.

Si schiatta ‘o core

che te ne faie ?

Falle fà Pasca e pure Capuranno

dalle na jonta

‘e chello ca tu tiene

ca te fa bbenne

tante ca ne tiene.

Quanno succede

so’ ll’ommo cchiù felice,

me sento meglio

invece d’’o jettà.

Gioacchino Ruocco

Ostia lido   08/01/2014

Inserita nella raccolta “Anno nuovo”