‘O silenzio…

‘O silenzio ca nun more,

tene ‘int’’o core

qualche atu ricordo

e io ca ‘e te nun me scordo

ne tengo a mmille,

‘a quann’eremo piccerille,

‘e quanno criscenno criscenno                                               

te ive facenno

na bella guagliona

e accumminciavo a suffrì

p’’a gelusia

ca me pigliava.

Eremo comme frato e ssora,

m’ammore ca se scetava

me deve ‘e turmiente

accummincianno a suffrì

comme a nu ‘nnammurato

ca si nun te truvava

vuleva sapè

addò stive, cu cchì e pe comme.

‘A pucundria

nun era na pace.

Era na malatia

ca doce nun era

e ‘o silenzio che m’affugava

c’’o chianto ca me pigliava

era ‘o silenzio cchiù amaro

ca stevo ‘mbaranno

murenno ogni gghiuorno pe te

cu na pena ‘int’’o core

pe tutt’’e ricorde

ca nun me scurdavo.

Gioacchino Ruocco

Ostia Lido          13/01/2015

Inserita nella raccolta “E’ ancora primmavera”