Quanno ‘o cielo se ngrogna…

Quanno ‘o cielo se ngrogna

manco ‘o penziero e na bella jurnata

ne porta ‘e nnuvole luntano.

Pe copp’’o bbosco

‘e frasche sbattene p’’o viento

int’’e scirdine ‘e ppagliarelle

fanno ‘o duvero lloro

ma pe terre, limone e mandarino

so’ nu chianto.

LL’evere d’’e mmure

può sta sicura

ca pur’essa soffre.

Nzieme a chi tene

tutte l’allergie ‘ stu munno.

Sbatteno ‘e lenzole

comme a vele

ca se ne porta ‘o vico.

‘O mbrello è inutile

Si arape

‘o viento ‘o schianta.

LL’unica che canta è Filumena

ch’è n’ata vota prena

e stanno a casa

se mette a pposto

tutto ‘o curredino

ch’era ‘e Geppino,

‘o primmo criaturo.

Meglio ‘n ascì d’’a casa

ca so cadute abbascio

doje tre piante.

Ogne tanto na lastra

ave nu schianto.

Na mamma sta chiammanno ‘e criature

ca correno cu ‘ fazzulette  mmane

comme a palomme pazze.

Ma io cchiù pazzo ancora

senza sentì ragione

esco pe na mez’ora.

Voglio sapè che faie.

Si haje bisogno ‘e niente.

Ma quanno veco ‘o mare

resto sturduto.

Me fermo e me mpapino.

Te vulesse a mme  vicino

p’essere nu penziero sulo

pure stammatina.

Gioacchino Ruocco

Ostia Lido, 25 gennaio 2015

           Inserita nella raccolta “Suspire 'e miezejuorno”