Parlammo sottovoce ca te sento

Vulesse parlà ‘e te sempe redenno,

sempe pazzianno e cu nu core allero

comme quanno vene primmavera

e ‘o core ‘o siente ca è cchiù felice.

E invece ‘a gelusia ca te piglia,

m’è fatta disperà cchiù ‘e na vota

ca quase quase succede ‘o parapiglia

se rompe e se fa sciarra ca nun voglio.

Nun tengo voglio cchiù a stà a parlà

pe te spiegà comme te voglio bbene.

Me fanno pene tutte sti pparole,

me sento male e a mme nun me cunviene.

Tutta na vita, ‘a che ce canuscimmo,

a ggirà attuorno a chello ca già saie,

tutta na vita e nun capisce maie

comme so fatto e che si tu pe mme.

Quanno me miette ‘o meglio ‘int’’o piatto

e io ‘o mette dint’’o piatto a tte,

quanno m’accide e faccio finta ‘e niente,

pure cu ‘e diente  io m’attacco a te.

Pecchè te voglio bbene e int’a na mano

te tengo comme è chello ch’è cchiù caro.

Lassammo perdere ‘e gghiurnate amare

e statte ‘mbracci’ a me ncopp’a stu core

comme a ll’onne d’’o mare calma e doce,

parlanno sottovoce ca te sento,

senza tempeste ‘e chianto e vviento.

parlammo sottovoce ca te sento.

Gioacchino Ruocco

Ostia lido           05/01/2015

Inserita nella raccolta “anno nuovo”