‘A jattella…

‘Ncopp’a nu terrazzino morta ‘e suonno

stà na jattella ca vulesse ascì

pe se ne jì’ p''e vicule vicine

pe jì’ a vedé ‘o munno comme è fatto

e si ce stanno attuorno ll’ati gatte

e ‘a mamma soia c’’a mettette a munno.

Nu sorece che d’è nun l’ha maie visto

e ‘un s’arricorde cchiù che vo’ dì " friste",

mentre ‘o piattino nun resta maie vacante

si ‘e ppreja o nun ‘e preja tutte ‘e sante.

ca vonno bbene pure a tutt’‘e gatte

mentre ‘a patrona arape na buatta.

Chesta signora l’avette pe regalo

a na guagliona ca cumbinava guaie

e s’’a faceve ch’’e gatte sulamente

ca comme a esse ‘nzapunava ‘a ggente

strusciannese  mò a chisto e mò a chill’ate

e suspiranno p’accuncià ‘a jurnata.

Penzava e ce penzava tutt’’e juorne

ma sempe ‘o terrazzino ll’attuccava

fino a ca na sera suspiranno

nun le venette ‘a chiagnere e capette

c’’a vita ca faceva nun le piaceva cchiù.

Nun saccio comme, pigliaje e se ne jette.

ca quanno ’a veco penzo: -  Fuie nu suonno

ca se facette quanno ‘o mese ‘e marzo

o passaie nu jatto ca facetto ‘o pazzo

comme a nuvena ‘e chi va dd’’a Maronna

ca se scete matina e muorto ‘e suonno

dice ‘o rusario  pe nun jì’ maie a funno.

St’appassuliata dint’a n’angulillo

e nun se move comme si fosse ‘e preta.

Nun tene maie nisciuno c’’a va arreta,

nun tene maie nu sorece pe ‘nnanze.

Fa ‘a signurine ma no pe scelta soia

dint’a sta casa ce stà 'e casa 'a noia.

Gioacchino Ruocco

Ostia lido      01/11/2012      h 9.30

Inserita nella raccolta “ TIPI “