…e pare ca mò more.

Se ne jette abbascio ‘o puorto

e ce restaie nervuso pe s’’a fa passà

a guardà ‘o mare ca sbatteva nterra.

Ll’onne cchiù grosse e ‘e vvote piccerelle

comme ‘o viento ‘e ppurtava

o comme ‘e bbarche ‘e facevano

passanno cchiù accoste ‘a riva.
Ma che vulive tu, nun ce penzaie cchiù.

Fernette pe calmarse, pe se fa cchiù ddoce.

Scagnaie ddoje parole e s’accurgette

ca nun valeva ‘a pena ‘e stà a suffrì,

ca te vuleva bbene, ca senza ‘e te suffreva.

ch’ire ll’anema soia e supiraie

comme fa ‘o viento quanno è alla sirena.
Quanno si ‘nnammurato si una cosa,

comme a nu specchio ve tenite mente.

Mò Rosa ‘o guarda e l’accarezza ‘e mmane,

‘e tene astrente pe nun ‘e lassà cchiù,

dimane o quanno turnarrà sta fantasia

ca uno dice subbeto e ll’ato dice doppo,

quann’uno è troppo sapurito ‘e sale

e ll’acque nun l’avasta, nun ce ‘a fa,

annozza nganna e pare ca mò more.

Gioacchino Ruocco

Ostia Lido        25/03/2015

Inserita nella raccolta “Ce steva na vota…”