E’ sulo nu pertuso…

E’ sulo nu pertuso chistu vico,

ma ‘a dint’a nu ciardino

s’affaccia ‘o meglio fico

cu ’e fiche puntulelle

quanno so’  ‘e mise lloro.

‘O sole  perde ‘o tiempo

appriesso a na figliola

e ‘a mamma n’apprufitta

pe spannere ‘e lenzole

ca ll’aria è sopia sopia.

Tutte se fa cchiù ddoce.

Pure ‘e pparole

ca pareno scetate

‘a nu suonno ‘e nnammurate.

Nu mandarino rire.

Sta priparanno ‘e sciure

pe fa n’ata schiuppata

c’’o core quanno ‘a sente

se guarda attuorno

‘e tene mente ‘o munno

ca sulo ccà se scorda ‘o funno.

E na guagliona canta

e  na palomma vola

senza cerca nu sciore

senza capì ‘e pparole.

Gioacchino Ruocco

Ostia lido         20/03/2015

Inserita nella raccolta “Ce steva na vota”