A mamma d’’o latte…

A mamma d’’o latte…

Chesti parole toje so’ tutte core.

Te lieve ‘a nanze ‘o piatto cu ‘e scarole

e ddice: - Mangià a me ca nun canusce.

Nu piezzo ‘e pane è pronto affianco ‘o piatto

e nu bicchiere ‘e vino frisco frisco.

Assitteto! Fammello stu piacere.

comme si fusse n’atu figlio mio

ca nun ce ‘a faccio a te vedè appiciuto

comme a nu pullicino, tutto ‘nfuso.

Chi songo nun ‘o saje. E che te mporta.

Quanno aggio aperto ‘a porta

e comme a Cristo  te si parato nnante

n’aggio truvato nato tutto nfuso

senza na scusa p’’a chiurere all’istante.

E beneditto sia nostro Signore

ca m’è mbarato a vulè bbene a ll’ate.

Levete ‘o nfuso ‘a cuollo, chesto è ‘o sciutto

e primma e te ne jì te dò nu mbrello.

Miettete a riparo quanno chiove,

sotto a nu purtone cu ‘a carretta.

Chesto diceva mamma a nu guaglione

‘e na dicina ‘e anne o poco ‘e cchiù

ch’era rimasto dint’’o lavarone

cu ‘a carrettella  cu ‘e pisce ca venneva.

Guardavo a mmamma e quase ‘un ce credevo.

Teneva figlie ‘e latte chi sa quante

ca deve ‘o latte a chi nun ‘o teneva

ca cu na riverenza ‘a ringraziava.

Si nun ce stive tu mureva ‘e famma.

Nun ce ‘a facevo cchiù a sentì ‘o chianto.

‘A cunnuliava ma ‘a notte nun passava

fino a ca nun s’è aperta ‘a porta

e si arrivata tu comma a santa

pe tutte sti guagliune muorte ‘e famme.

Ca Dio t’’o renne e ‘a maronna pure.

E ancora ogge qualche sora mia

facenneme ‘a surpresa ‘e parla ‘e mamma

me dice ca s’’a sonna  ogne  tanto
e na nuvena le fa comme a na santa.

Gioacchino Ruocco

Ostia Lido     27/04/2015

Inserita nella raccolta “Ce steva na vota…”

Raffaela Gargiulo