Castiellammare

Castiellammare...

                                                  Ma ve rendite cunto quanto è bella
                                                  chesta città ridotta a nu burdello ?
                                                  Tene ricchezze attuorne e dint''e vvene
                                                  acque pe levà sete a tutto 'o munno

                                                  e invece sta per fernì a funno
                                                  disperata pe nu dà a campà
                                                  a chi 'a fatica nun 'a tene cchiù.
                                                  Ricchezze ca se sprecano e fanno

                                                  male, tanto 'e chillu mmale ca pozzo
                                                  fernì stu juorno comme è n'ato
                                                  scurdato 'a tutto quante
                                                  pure d''e sante ca stanno dint''e cchiese

                                                  ca restano vacante senza scuse.
                                                  Manco 'o bebello pe nu criature
                                                  trovo a guaragnà giranno attuorno.
                                                  I' l'arriffasse 'o core,

                                                  ma 'n è capace 'e chiagnere
                                                  pe te levà ddoie lire 'a dint''a sacca
                                                  e comme 'o mare stracqua 'nterra a rena
                                                  me sento perzo dint'a nu mare 'e pene.

                                                  Ma sta grannezze 'e Ddio a che ce serve ?
                                                  LL'ate ce fanno 'a guerra
                                                  e nuie restammo appiso a fà 'e sciabule...
                                                  cu 'e fodere pe terra muorte 'e stiente.

                                                  Gioacchino Ruocco
                                               
                                                   Ostia Lido    18/04/2014
                                                   Inserita nella raccolta "Ce steva na vota..."
                                                   pubblicata il 18/04/2014 su Gente di Stabia.