Quanno m’aspietto ‘nfi’ a mezanotte

Mario Rosati - Riposo - Acrilico - cm 70/cm 50 - 2010

Quanno m’aspietto ‘nfi’ a mezanotte

e cirche e ‘un t’addurmì, ma stanca morta

te trovo già addermuta dint’’o lietto

te veco cu na faccia rassignata

stanca ‘e m’aspettà tutta ‘a jurnata

cu nu suspiro ca nun trova pace

sempe a penzà si torno vivo o muorto

si chello ch’evo fa è gghiuto stuorto.

Te vaso ll’uocchie e t’arrefresco ‘a fronte

cu na carezza ca tengo dint’’e mmane

‘a na jurnata sana, ‘a tantu tiempo

c’’o juorno pare eterno tanto é luongo.

Vicino a te me stengo chianu chiano

comme a nu piezzo ’e pane appeno cuotto.

Dimane ch’è ddummeneca te sceto

quanno te vuò scetà, arrepusata

comme a nu muorzo ‘e pasta sapurita

addò se mmesca ll’uoglio e ‘a pummarola

cu na cuttura lenta, accummigliata

pe darle ‘o tiempo ca vò sta cucinata.

E quanno arape ll’uocchie ‘a maraviglia

se sceta assieme a te e che te piglia

quanno te vaso, quanno t’astregne a me

ca songo ancora vivo affianco a te.

Gioacchino Ruocco

Ostia lido              11/04/2015

Inserita nella raccolta        “Ce steva na vota…”