Areto a casa...

Areto a casa tengo nu ciardino

ca chi ce trase resta a vocca aperta.

Ce stanno piante ‘e frutte  ‘e ogni stagione,

ce stanno sciure ca canteno canzone

sotto ‘o sole cucente, vrucculuso

ca fa ammunina ‘nfì che more a sera.

Quanno m’affaccio m’arriva nu prufumo

ca nun me fa sentì maie sturduto.

Si arriva ‘o viento nun fa na lira ‘e danno.

Ce stanno attuorno attuorno mure ‘e sepe,

‘e pine, ‘e tufo e tanta pagliarelle

ca teneno ‘o ciardino sempe calmo.

L’acqua d’abbrile è nu refriggerio

e ‘a malva, aruta, alaccia, ‘o putrusino

s’attaccano pe terra e chi ne caccia.

‘A prevula ‘e uva asprinia

me tene frisco ‘o passo addò cammino

mentre luntano a ll’uocchie de vicine

ce sta na macchia ‘e sole ca me scarfa

pure si ‘o tiempo è matto

e me vulesse dà ‘e vvote ‘o sfratto.

Gioacchino Ruocco

Ostia Lido             18/04/2015

Inserita nella raccolta "Poesie a ll'acqua 'e rose"