Parlammo ‘e Peppe…

Nun mettere ‘a culata addò te pare

ca ‘int’a stu vico ‘o sole nun ce arriva

Mmnco a miezojuorno quanno sta ritto ncielo

e t’acceca si ‘o guarde nu minuto.

'O Pataterno ‘o spanne

addò ‘e culate hanno bisogno ‘e isso

ma stu terrazzo ca sta sempe ascuro

sape ‘a bufagna o sultanto ‘e viento

ca leva ‘e fforze ‘a cuollo

e ‘int’’o surore te fa restà a mmuollo.

Si nun fosse pe ll’asteco

‘a coppo ‘o quinto piano

tenisse ‘e panne nfuse int’’e cassette

e si nun fosse p’’a curtesia ‘e Peppe

‘a bagnarola quanno ce arrivasse.

Tieneme mente, gaurdame ‘int’’a lluocchie.

Chi te vò bbene nun t’’o manne a dicere.

‘O sole asciutta ‘e panne e ‘o core ‘e chianto

e Peppe te vò bbene, ma ‘n è santo.

Vulesse ‘a te nu vaso quanno ‘o guardo,

quanno ritorna tarde e tu l’aspiette

cu ll’uocchie triste comme a chi se perde

mmiez’a na via ‘e ggente ca nun sape,

c’arape ‘a porta stanno sempe attiento,

ca soffre ma nun siente nu lamiento

ascì da vocca soija manco si ‘o viento

a mette ‘o friddo ‘ncuollo quanno è ssera.

Si l’abbracciasse almeno qualche vota

girasse ‘a rota senza fa remmore.

Na carezza ‘e vvote fa miracule.

Te regne ‘e bbene ‘o core e se va nnaze.

Parlammo ‘e Peppe, ancora e sempe ‘e Peppe.

Che ce vuò fa quann’una se ‘nnammora.

‘O core nun sape ati canzone

pe ghiuorne e gghiurne fino a ca nun more

‘o desiderio ‘e sta nziemo cu isso.

Succere spisso ca nun s’aiesce ‘e casa

manco pe nu sciato ‘e aria fresca,

c’’o ppane avasta pure pe nu mese

c’’o tiempo nun ‘o cunto e nun ‘o ssaie

quante ne passa o n’è gia passato.

Faie na vita comme  ‘e ribusciate.

T’avasta nu suspiro pe campà.

Chi sona sona nun s’arape ‘a porta

e si ti chiammano da strata chi s’affaccia.

Si ‘a casa se ne care che te ‘mporta.

Muore cuntento senza sapè che r’è

‘a cuntentezza. Dint’a la rezza staie

e si felice ca Peppeniello frije

e tu te mmucche ‘e ciance ca te fa

e nun allucche cchiù ca si ffelice.

‘A fine ‘o mese quanne faie ‘e cunte

t’avanze tutte cose e si cuntenta

ca dint’’e mmane nun rummane niente.

Tante dimane succede qualche ccose

e si nun so’ viole songo rose.

Gioacchino Ruocco

Ostia Lido 17/04/2045

Inserita nella raccolta “Supire ‘e miezojuorno”