Translate

Visualizzazione post con etichetta capille. Mostra tutti i post
Visualizzazione post con etichetta capille. Mostra tutti i post

venerdì 10 giugno 2016

‘E paise…




‘E paise so’ sempe piccerille
e chi te sceppe ‘e capille ‘o fa pecchè
ave bbisogno ‘e te
pe fa vedè ch’esiste.

Facennese cchiù gruosso
farrà ‘o cammurrista
o sarrà n’amico
ca te vò sempe bbene.

Ognuno se sceglie
‘o cumpagniello suio,
‘o sotto, ‘o meglio
o chi le po’ fa ‘e spese.

E io senza pretese
sciglette ‘a te ch’ire
na cana ‘e presa ca me
veneve appriesso

si pure me ne jevo
‘ncopp’a muntagna
o me jettavo a mmare
cu tutt’e panne ‘ncuollo.

Dint’a nu paese
pare c’’a ggente
se fa ‘e fatte suie
ma doppo nu minuto

già sapevano ‘e nuie.
Stammella  attienta
me dicette ‘a mamma
E patemo,: - Guagliò,

vide che faie ca quanno
te faie gruosso po’ so’
guaie pe t’’e levà ‘a cuollo
chello ca mo’ nun saie

o tu nun vvuò capì.
Pe me fernette
‘o juorno ca partette,
pe Mena ‘un fuie accussì.

Turnavo poco
e nun me n’accurgette
d’’a vita ca faceva.
Nu juorno scumparette

e chi diceva cose ‘e llatu munno
e chi s’era jettata ‘a funno
sott’’e Faragliune
na notte ‘e luna chiena.

Nu juorne ca nnanze m’’a  vedette
nun me guardaie manco
scumparette comme a nombra
dint’’o scuro d’’a via ‘e vascio.

E io currette, currette fino a quanno
‘o sciato nun m’’o dette.
L’avevo perza ‘e vista
o s’era ‘mmucata dint’a na casa.

Ma quale ‘e chelli ccase
‘e vascio ‘o puorto ?
Quanno chiedevo
rispunneva ‘o viento.

A stiento a stiento
truvaie qualcheduno,
‘o riesto a mmare
ca traseva ‘a sera.

Era sparuta,
nisciuna ‘a canusceva
ca se perdette
pure ‘o nomme suio.

Na vota sola
truvaie chi ‘a sapeva
e rummanette ‘e stucco
sentenno  c''a cercavo.

Era nu guaglione ‘e quinnicianne
ca me guardaie locco
comme pe dì chi sì.
Che te ne ‘mporta ?

Me giraie ‘e spalle,
sbattette ‘a porta
d’’a casa cchiù vicina,
restanno sulo sulo mmiez’’o vico

senza cchiù sciato nganno,
senza capì che fà.
Uno ca passava me dicette:
-Ccà nun ce sta nisciuno

cchiù ‘a tant’anne.
E pe me fà capì aprette ‘a porta:
ce steva nu ciardino
e sotto ‘o mare.

‘A casa ca ce steva
era ‘o sprufunno
e mmieze’’e scoglie
ll’aneme ‘e llatu munno.

Gioacchino Ruocco

Ostia Lido           10.06.016

venerdì 10 aprile 2015

Quanno 'o sole sponta ...


Piano di Sorrento







































Quanno 'o sole sponta
p''a rampa 'e Santa Teresa
me metto 'nmanche 'e cammise
e t'aspetto.

Tanno é cchiù bello 'o sole.
'E llastre toie me parleno
dicenno sti pparole:
- Aiccanno, se sta lavanno 'a faccia,
se sta facenno 'e trezze,
mò vide che te caccia
stu mese 'e abbrile !

E arille arille
comme sò belle chisti capille,
che sò doie perle
chist'uocchie belle ?

E addure 'e rose
e anepeta nuvella
e 'o cielo te fa festa
quanno scinne
e i' e 'o core
'ncantate rummanimme
sule a guardarte,
sule a penzarte,
sule a te sunnà.


Ruocco Gioacchino 

Piano di Sorrento 1956