Chi songo... ? Da tipi - poesie napoletane di Gioacchino Ruocco

Chi songo....?

Si me dice: - Chi si ? I’ nun ‘o saccio.

Me so’ appuggiato a nu vraccio

e cammino

e vaco annanze

speranno nu juorno ‘e me regnere ‘a panza,

e n’ato ‘e scrivere canzone.

Comme a n’ arille

senza na penzione

senza penzà a dimane

ca n’arte ‘e mmane nun  ‘a tengo

ma cu na passione

ca m’abbruci’ ‘o core.

Chi si ? ‘A gente vo’ sapé chi songo.

Ma ‘e guarde ‘nfaccia

e nun rispongo.

Nn’ ‘o saccio.

‘E vvote penzo ca so n’ato

e nun songo io.

‘E ccose cchiù luntane c’arricordo,

so cose ‘e ll’atu munno.

Allora sti penziere mie ‘e chi so’ ?

Si so’ dde mmie

me so’ venuto mmente

sfrennesianno forse inutilmente,

ll’at’anno, o ll’atu juorno.

Cert’é ca io te guardo e penzo

ca me so’ perzo dint’a ll’uocchie tuoie,

c’‘o core è n’auciello o nu lione

e appriesso appriesso

nu scemo ca fa fint’e niente.

So nu penziero, 'e vvote so’ pparole,

‘e vvote arraggia, ‘e vvote cacasotte.

E c’aggia fa si nun me piace ‘o munno?

I me ‘mbriache sulo quanno voglio,

cu ‘e parole ca ‘mbroglio

pe nun te dà ‘a vedè

ca nun capisco niente

o penzo ancora a te.

Si tu… tu si qualcosa,

i’ nun so niente

e p’’a famiglia mia nu male ‘e diente

ch’’e vote passa e 'e vvote fa ‘mpazzì.

Ostia Lido 28/08/2004

Pubblicata il 3/06/2011  sul "Ruoccotribu.blogspot.com"