Me vesto sempe a smerza - Da Tipi - poesie napoletane di Gioacchino Ruocco

Me vesto sempe a smerza

e fosse na matina

ca me scetasse tarde.

‘E cinche d’’a matina

sto già cu ’e piere ‘nterra.

Manco si jesse a guerra

fosse accussì puntuale

pe cagnà via,

fa finta ‘e nun sentì.

‘A ggente ca nun ‘o vo’ capì

‘a cerca ‘int’’e ggiurnale

‘a verità ca vo’.

Pirciò se va a fernì

sempe cchiù male.

E po’ me viene a dì

ca songo tale e quale..

Ma tale e quale a chi?

Ma che me staie a dì ?

Ma tu che vuo’ capì

si nun m’è maie capito ?

Cammino ‘ncopp’’o vrito

tutt’’e juorno

e ‘a ggente attuorno

nun se n’addone manca.
Ma io, io nun me stanco

‘e te restà vicino

d’‘e cinche d’’a matina

fino a sera

cu tutte sti penziere

ca me fanno suffrì

a essere sincero

cu chi ‘nn ‘o vo’ capì,

‘nzieme cu chi

nun po’ truvà cchiù pace

quanno ‘int’’a casa a ffianco

nun songo cchiù capace

‘e nu piatto a tavula,

‘e na jurnata calma,

‘e na resata allera.

Quanno ‘e criature a sera

chiagneno ca vonno ‘o pate.

Quanno tutt’’e penziere

nun fanno na jurnata

appriparata allera

manco cu na jucata.

Gioacchino Ruocco

Ostia Lido,      16/01/2014