Pe me nu juorno…

Pe me nu juorno

po’ addeventà jurnata

quanno te voglio

e sto cu te abbracciato,

quanno t’astregno

e tu appassionata

cchiù nun me lasse

fino a c’’a nuttata

'n arrive

pe st’addermute

una vicino a n’ato,

p’avé cchiù tiempo

pe te guardà speruto

‘e te vulè ancora

nu minuto

comm’a n’eternità

ca nun m’appassa.

O juorno è juorno

si tu me staie attuorno

e na guardata

nun m’assigne maie,

quanno me faie ‘nquartà

quanno te scucce

e vuo’ resta da sola

comme a na parola

senza n’aggettivo,

si pe currivo

nun me vuò parlà,

faie finta ‘e nun sentì

e staie arraggiata

ca si m’avisse a tiro

tu me facisse niro

comme ‘e vvote me faie,

ma quanno ‘o juorno

votta ‘int’a nuttata

e cagna faccia,

chello ch’è stato è stato,

è sulo na jurnata

c’aspetta e se fa doce

int’’a nuttata.

Ostia Lido / 21 maggio 2011 / ore 10,00