Marzo...

Marzo è pazzo

e nun s’arrenne maie.

A nu mumento a n’ato

s’arapa ‘o cielo

e ‘o sole aesce,

po’ se rencresce

e mena nterra

‘o patabate ‘e ll’acqua.

Stracqua sta ‘o cielo e vvote

ca se fa niro niro

ca pare nu suspirò

ca s’è annuzzato nganna.

A ggente che cammina ‘o tene mente

pe scorgere quanne s’arape e chiure

e chi nun tene ‘o mbrello

cammina muro muro

p’arreva ‘a casa

o j pe nu servizio.

Invece chi nun sape c’adda fà

e penza sulamente e ridere e pazzià.

se mette a correre c’’o core mmano

pe vie ‘e sta città

zumpanno int’’a puzzanghere

pe fa ‘e schizze a ll’ate

e o stesso ‘e guagliunciello

ca so cchiu friarielle

fanno nu zanghero

e ogni pantano,

na lozza

ca fa sciulià sta via.

Io ca nun pozzo movere nu dito

guardo pe dint’’e lastre

chesta felicità 

ca maie m’è appatenuta

a che so’ nato

nzerrato int’a sta casa

sultanto a m’’a sunnà.

Gioacchino Ruocco

Ostia Lido          10/01/2014

La poesia è inserita nella raccolta "Suspire 'e miezojuorno" 

editate su "Gentedistabia.blogspot.com