‘E figlie ‘e ‘ndrocchia… Inserita nella raccolta “TIPI”

Quann’eremo guagliune

jenno ‘o mare

pazziavemo facenno

‘e buche ‘nterra

comme a na trappula

p’’a ggente ca passava

e jastemmava

quanno ce ferneva dinto.

‘I’ che triato!

Mannaggia ‘e figlie ‘e ‘ndrocchia!

Si l’acchiappe..

Ca me sembrava ‘a guerra

‘e ll’ommo ‘e ciappa

si ce acchiappava?

Si ce acchiappava

erano chianette,

cauce, schiaffe e seghezzune,

ma primma ‘e ce acchiappà

chell’ata buca,

assaie cchiù grossa,

quase quase

le ciuncava ‘e cosse

e nuie a rirere

facennele pernacchie.

‘E stufe arene

erano na scusa

pe fa pertuse nterra

e pazzià

comme si fosse a guerra

pe rirere nu poco,

pe nun sta fermo n’attimo.

‘E vvote dint’’o bbuco

appacciaveme ‘o fuoco

pe fa ‘o Vesuvio

ca faceva fummo:

nu foglio ‘e carta

nziemo a duie battumme

e ‘o riesto

nu triato appriparato.

nu fuia fuia apposta

e ‘a ggente c’alluccava

fino a ca nun sgamava

‘o scherzo e jastemmava:

-         Mannagia ‘e figlie ‘e ‘ndrocchie…!

Gioacchino Ruocco

Ostia lido, 26/01/2014

Inserita nella raccolta “TIPI”