Don Ferdinando - Da Tipi - poesie napoletane di Gioacchino Ruocco

Don Ferdinando

tene ‘a faccia tosta

‘O ssape c’’o fa apposta

e ‘o continua a fa.

‘Ncuiete ‘e criature

e cchiù ‘e nu pate l’è prumise

na bella mazziata

si ‘o figlio torna a casa

cu ‘e llacreme ‘int’’a luocchie.

Ch’’e fa ?

E dice doie papocchie

ca songo figlie ‘e ‘ndrocchie

che ’e vò adderezzà.

Ma intanto ‘e guaglinciellè

c’’a scusa d’’o fastidio

l’hanno pigliato ‘e mira

e ‘o stanno a secutà.

Ma  chi adderizzo isso

ancora 'un s’è truvato

cu tutte ‘e schiribizzi

c‘’a ggente sta a passà.

‘E tipe comme a isso

sule ‘int’’e votta votta

le può dà qualche botta

pe nun ‘o fa parlà.

E sta facenno chesto

quase ‘a na vita sana.

Nun è c’allonga ‘e mane

ma tene ‘a lengua longa

e te fa ‘ncuità

cu chello ca te dice

quanno tu passe a llà.

Ostia Lido 4 aprile 2011 ore 20,00

Pubblicata il 3/06/2011  sul "Ruoccotribu.blogspot.com"