Doppo na chioppeta d’acqua

Doppo na chioppeta d’acqua

o n’ombra ‘e maletiempo

ll’aria s’è fatta triste

comme a nu monumento

ca tene sempe 'a stessa faccia

ma nun le ‘mporta niente

‘e che succede attuorno.

Quatt’aneme

dint’a na matina ‘e freve

n’aria sciacquata

ma p’’a farla breve

me pare scunfirata

pure si ogne prete

se fa nu pizzo a riso.

Si fosse ‘nnammurato

tirasse sta guagliona

cchiù vicina a me

pe le fa sentì

tutt’’o bbene ca le voglio.

Forse le piace ‘e perdere

n’atu ppoco ‘e tiempo

cchiù annante

addò pure nu sante

perde ‘a pacienza ‘e fa

chello c’adda fà

chi ‘o core s’è ‘mpignato.

Gioacchino Ruocco*
* Biografia in Pagine

05.06.019         Ostia Lido