Ma mò, oj nì, stu guaio.....

Ma mò, oj nì, stu guaio

chi s’adda chiagnere

ca ogne ghiuorno

ce ne sta qualcuno ?

Nu guaio comme è chisto

è troppo gruosso.

‘A carne ‘nfacci’ a ll’uosso

‘un se mantene,

nun dura eternamente

e chi st’attuorno soffre

comme a chi sta suffrenno

‘e pene eterne

primmo ‘e jì all’inferno.

Cu chi ce amma piglià ?

C’’o Pataterno

ca eternamente

isso nun po’ murì ?

Ma comme c’è fatto malamente !

Ca già murì è troppo.

Faceva poca ggente

e ‘o juoco era ‘o stesso.

Mò comme a nu chiuvo

sto ‘nfacci’ ‘o muro appiso

e isso che c’è miso

sulo ‘a pacienza nosta.

‘A soia starrà nascosta

chi sa a qua paraviso.

Nascette cu ‘a cammisa,

ma a nnuie annure

comme stammo ancora.

Primmo ca more m’accatto

na sciammereca a Pugliano

si no c’’o culo a fora

chisto me fa murì

c’ancora ‘un è cuntento

comme stammo a ghjì.

Gioacchino Ruocco

29.09.018  Ostia Lido