 |
| Bardana sui muri di Via Supportico - Castellammare di Stabia |
Lavaveme ‘e butteglie cu ‘a bardana.
Mò ca st’abbitudine è passata
‘a guarde ‘nfacc’’e mmure e stongo a ll’argo
cu n’ombra ‘e nustalgia. M’e so’ scurdato
‘e tanta cosa , ‘e tanta sentemiente.
Mò scanzo ‘e vie pe l’allergia ca dà.
Quann’ero nu guaglione ero aggarbato,
facevo chello ca diceva mamma,
ca si vedeva ll’uocchie mie arrussate
diceva: - Nun passà pe chella via.
‘Vide ll’uocchie comme se so’ fatte !
E si te manca ‘o sciato, che facimme ?
Quanno s’attacca ‘ncuollo me piace,
me ne favevo nu vestito sano.
Lavete ‘e mmane e nun te tuccà ‘a faccia .
E me levava ‘a cuollo ‘o cazunciello
ca subbeto lavava e pò stenneva.
Ogge ‘e mmure pare ca stanno annure
senza bardana, senza na cicoria
e ‘o ciente nurghe appiso. Ripa pe ripa,
ma nun s’attacca niente a sta cammisa,
a stu cazone. Mò ll’ombre pareno accise
senza n’arillo o n’auciello ‘e passo.
Quann’eremo guagliune, ma che spasso
cu ‘e piere dint’’o rivo ‘a fa ‘o sisco
‘e na serpe e nu cardillo, na cevetta
e a correre p’’e ripe comme a matte
fino a c’’o core nun diceva basta.
Gioacchino Ruocco
Ostia Lido 30/09/2015
Inserita nella raccolta "Ce steva na vota..."
