‘A ggente comme a te

Quanno ‘o stentino volle

‘e scolle nun te serveno.

Nun l’è capito ancora

ca è magnà di meno?

‘A ggente comme a te

a nuie nun fa paura

però me faie venì na cosa

quanno ce chiamme o suono.

A cunzervà so’ tutte quante bbuone,

ma tu cunzierve male

e ‘a panza po’ ne soffre.

Dice: - ma io ‘o metto

‘o posto cchiù sicuro

addò pappece e surece

nun ponno arrevà maje.

Però staie sempe a rompere

e a correre ‘o spitale.

Si tale e quale a mmammeta

ca se magnava tutto,

ca n’uosso ‘e nu presutto

s’’o rusecaie nu mese

primme ‘e ce fa ‘o broro

cu tante d''e pretese.

Quanno tu faie ‘a spesa

accatta ‘o nicessario

e fattelo avastà.

Stanno c’’a panza all’aria

riesce a ‘rrepusà.

Cu chello ca t’avanza

fa bbene a qualcun ato,

na vota na lammosena

ma che te po’ custà?

Na furchettata ‘e pasta,

duje friarielle e meno

e mica tu si prieno

ca si te veno ‘a voglia

faie correre ‘e vicine,

Nicola, Custantine,

Peppe ‘o cusetore,

don Ciccio ‘o falignammo

e Peppenella ‘a crema.

Guarde c’’a ggente scema

nun è maie stata.

Campanno ‘e sta manera

ch’è na cangariata

nun truove cumpagnie.

‘A quanno è morta ‘a zia

faie chello ca vuò tu.

Na bella fetenzia,

ca quanno nuie currimme

restammo o rummanimme

cu ll’uocchie tanto ‘a fore

pe nun piglià maie ciato

ca chi ‘o piglia more.

Gioacchino Ruocco

Ostia Lido         2015/09/21
Inserita nella raccolta "Tipi..."