Pe coppo a Caperrina

Pe coppo a Caperrina

ce passa ‘o tiempo

na nuvola  scuntenta

tutt’e juorne.

Trattene ll’acqua a stiento

pure si ‘o viento ‘ a sbatte

contre ‘e mmure

d’’e palazze attuorno.

Palazze mò, na vote… forse,

ma qualc’anno arreto,

mò vonno  stà cuieto

ca se sgarrupe ‘o munno

si 'a ggente attuorno

fa sulo nu sternuto.

Na goccia d’acqua

e  tremmano  ‘e spaviento.

A chi cunviene chistu scasamiento ?

So’ cchiù ‘e trent’anne, comme passa ‘o tiempo!

I’ comme more ‘o core!

Tene mente e nun ce crede

ca è assaie cchiù gruosso ‘o cielo,

ma ‘o Pataterno ancora nun ce vede.

Gioacchino Ruocco

Ostia Lido           2015/09/24

Inserita nella raccolta “Ce steva na vota…”