Pare ca mo te veco

Amerigo Vespucci a Castellammare di Stabia

Pare ca mo te veco

eppure ‘e tiempo n’è passato tanto.

Forse qualc’anno,

forse duje o tre.

‘O saje meglio ‘e me,

pure ‘o mutivo.

Ma nun ‘o vire

comme stò tremmanno ?

Te guardo e nun ce credo.

Tiene na faccia tosta

comme ‘e prete,

comme ‘e prievete ca fanno sizia sizia

pe fà ‘e fatte lloro.

Quann’ire nu tesoro

‘un m’’o dicive

chello ca ll’uocchie mò

vanno dicenno.

Ma addò m’’e appengo

tutte sti parole

chist’uocchie doce

ca me staje facenno ?

Puortele dint’a chiesa

ccà vicino

o dint’’o Viscuvato

ca stammatina

Santu Catiello

l’hanno miso esposto.

Fra qualche ghiuorno

le facimmo festa.

‘A scusa è bona !

Comme a chella ‘e quanno

te ne jìste

lasciannemo dint’’o farmacista

addò truvaie sulamente

pinnele p’’a freva e no p’ammore

visto ca me lasciaste

comme a nu cammurrista

ca se ne parte ‘e notte.

‘E botte so’ p’’o santo.

Nun saccio chi fa festa

si te vede ?

Si te canosce ancora qualcheduno ?

Qualcuno attuorno manca

ma tu a me nun mache.

Ormaie ‘e te so stanca.

Io nun te penzo cchiù.

G. Ruocco    

Ostia Lido      019.04.017