Forse ce cunviene

Forse ce cunviene

Povero ‘o juorno ca me moro ‘e famma!

Si nun ce ‘a faccio cchiù ‘miez’a lutamma !

Io tengo na passione dint’’o core

ca nun vò murì ma campà murenno,

nu core ca ‘un s’arrenno senza pace.

Sento chello ca dice ‘a gente attuorno

e me piglio scuorno ‘e campa ancora.

Qualunque cosa pare malamente

e allora se cundanna ingiustamente

chille ca vanno ‘ncerca e sussitenza.

Tenimmo tanta ‘e chell’arraggia ‘ncuorpo

penzanno ognuno ‘e nuie diversamente

ca ce guardammo quanno ‘ miezo juorno

comme a cane arraggiate ca sanno

sulo ‘a famma nera, sulo miseria.

‘O fatto è serio specie si sentimmo

a chi vene e ce dice tutt’’e juorne

ca isso sape ‘a mmericina justa

e po’ piglia na frusta e dà mazzate

facennete campà murtificate.

Ma chi ha dato ‘a scienza ca racconta

si fino a ieri steva peggio ‘e me ?

Ma chi l’è ghiuto ‘nzuonno chesta notte

c’ha fatto prufessore ‘int’a na botta

e parla e parla e te spacca ‘a capa ?

Pe chesto ca succedeno mazzate ?

Pe chesto ‘o mariuolo nun avasta ?

I campo cu cinquantagramme ‘e pasta

e sogno chino fino a quanno ‘a sera,

ma dint’’e magazzine nun avasta !

E vene ‘o juorno ca mangio na rapesta,

na frutta, na percoca punto e basta,

ma a chisto nun l’avasta invece niente

e semmena tempesta, viento o ato

ca stammo tutte ‘e juorne arravugliate.

Si ognuno ‘e nuie campasse a spese proprie

fernesse sta si loca ‘e tanta gente.

Quann’uno è bbuono succede ‘o mmalamente

ma si facimmo ‘e ccose tutt’assieme

forse ‘o munno va meglio ce cunviene.

Gioacchino Ruocco

23 agosto 2017                    Ostia Lido

Inserita nella raccolta: Ne parlammo dimane....