Chi muorto nun more

Chi muorto non more

chi sa ch’è fatto

ca s’arricorda ‘a gente ?

Sicuro nun è stato malamente

si no sti strille attuorno

chi s’’e sente ?

Me sento

dintt’a ll’uocchie ‘o chianto

‘e na cummuziome

ca me piglia.

Nun le so’ figlio

e manco le so’ frate

manco cumpagne ‘e scole

e de triate.

‘O canuscevo appena

ma ‘o stesso sento ‘ncanna

‘nu sennuzzo

ca saglie e scenne

e che ce pozzo appenno

nun ‘o saccio.

Me guardo dint’’o specchio,

so nu straccio.

Mò che s’accacia

chistu core mio?

Lassa fa a Ddio

e penza a campà ‘o riesto

d’’a vita ca te resta,

ma nun te perde

pe viche e vicarielle

comme a quann’ire

guagliunciello

jucanno accuvarella.

Sultanto ‘a voce ‘e mamma

te truvave

e tu senza fa storie

rispunnive

e ‘a casa riturnave

cantanno allero allero

a sautarielle

uno, doje e tre

zumpulianno.

Gioacchino Ruocco

27.03.018  Ostia Lido