Me trove ‘int’a nu ‘nguacchio…

Me trove ‘int’a nu ‘nguacchio…

Pizzicanno addovunque mette ll’uocchie

me trove ‘int’a nu ‘nguacchio

appriesso appriesso

e c’’o ‘nteresso

nun n’asco maie.

E stesse frisco si ‘o fatto fosse overo

so’ comme a na gallina ca cammina

e torna cu ‘a vozzola strachiena

e meno male ca faccio sule ove

si na sarria prena ogne ghiuorno.

E so sicuro ca tu nun me sbrevuogno

pure si ‘e buscie ‘ncopp’a ll’ogne

i ne cancello lavannele sultanto

all’ora d’’o magnà

pe nun m’’e fà guarde.

E nun c’è ghiuorno ca i’ ‘a passo liscia

ca tutte vonno a me chello ca ll’ate

nisciuno cchiù se file.

Ma si nun tiene ‘o filo

quale uocchie niro

vuò ‘ncatenà ancora ?

Turnanno arreto ancora ca memoria

me torna ammenta ‘a storia

‘e quanno nuie ce canuscetteme

e io azzeccato appriesso te rummanette

pe ghiuorne e ghiuorne

senza me piglià scuorno

ca tu redive mentre me guardave.

‘O saccio comme jette

nun me l’arricurdà

ca stongo ancora a dicere,

a pparte qualche ghiuorne bbuono,

ma chi m’’a fatto fà !

Gioacchino Ruocco

20.05.018   Ostia Lido