C.mare di Stabia - Via Panoramica a Mezzapietra.
Nel dopoguerra al posto di questa nuova costruzione ce n'era un'altra
dove il proprietario esercitava la vendita del vino al minuto
e faceva l'attività di cantina per chi voleva bere e mangiare.
Il suo soprannome era 'O ZIONE"
per la sua corporatura rilevane ed il carattere bonario che possedeva.

A ogne passo

nu suspiro nuovo,

a ogne ricordo

na canzone vecchia.

Me guardo dint’o specchio

e tengo l’uocchie ‘e chianto.

Me guardo e a stiente

me ricanosco appena.

Nun saccio si so’ chillo ca io veco

o chillo ca me sento

quanno rimango sulo.

Si guardo ‘nfaccio a ll’ate

‘e riconosco ancora.

Simmo diverse

‘a chille e ll’ati juorne,

cchiù viecchie e malandate.

Ma songo sempe chille

ca portano  ‘a jucata.

Ma ch’è succiese

‘e ll’urdeme nuttate

ca a me me pare

‘o juorno appriesso

‘e carnevale ?

Me lavo ‘a faccia

e pare ancora ‘o stesso

comme a nu fesso

ca ‘un s’arricorda ‘e isso.

Forse me songo ‘ìmbriacato

e tengo ancora ‘a scigna,

e ‘a capa é cchiù 'e na pigna 

e ‘a faccia

‘e uno ‘e chillo ca sbarea.

Chi sa quanto aggia vippeto,

chi sa comme è succieso

e ‘a cumpagnia qual’era.

Si me succere ancora

sarrà nu brutto guaio

si resto ‘mmiez’a via

a sfrennesia cu ll’ate.

Meglio na mazziata

almeno piglie e daie,

fernì sotto a nu treno

quanno si scunzulato.

Quanno se resta sulo

sulo staie ogne ghiurno.

Dimane ce vedimmo,

ma po’ nisciuno torna.

Chi te fa ‘e corne

nun sape c’adda dicere

Forse tene vriogna

‘e dicere buscie

e quanno esce ‘e casa

piglia n’ata via

e ‘a scusa è sempe bbona

pecche nun  riegge ‘o vino.

‘A cumpagnia ‘n è bbona

si nu bicchiere è troppo

e nun suppuorte ‘a botta.

Ll’urdema vota

m’avette purtà a casa

e tra ascì e trase

se facette juorno.

Quanno m’’o conta

me fa piglià nu scuorno

ca nun ve dico.

Crerevo ‘e avé n’amico

pecche a miezo juorno

veneva e s’assettava

ma doppo chistu fatto

io l’aggia dà ‘o sfratto

Nun metto cchiù ‘o piatto

pure pe isso.

A tavula invece ‘e isso

ce metto ‘o piripisso

ca se scurdaie nu jorno

dicenno:- M’’o piglio

quanno passo……….

Gioacchino Ruocco

02.01.019   Ostia Lido