Chi 'o sa....?

Chi ‘o sa…

Chi ‘o sa

si ancora ce ritorno

a ll’acqua d’a Maronna ?

Stongo luntano

doie tre ore ‘e machina

e tengo pure

addò Jì a mette tenne,

ma manca ‘a fantasia ‘e na jurnata

pe ghjì e turnà

o ce resta nu poco

‘o tiempo

e na giarretta ‘e acqua a’o puorto

qualche biscotto ‘a bagnarce dinto

qualche summenta, duie lupine gialle

e na nzalata  ‘e mare

e na fresella

cu ‘a pummarola ‘e piennelo

tutt’appassuliata ‘e sta stagione

ca sta bbona cu tutto

pure cu na ‘nzalata

‘e scarole janche.

Quanno te siente stanche però

basta ‘o ricordo

e ‘o core ca se lagne ma è cuntento

‘o stesso

pe n’appuntamento cu ‘a stagiona

bbona,  quann’è fernuta

tutta st’ammuina,

chistu votta votta

giè ‘e primma matina

che ogne ghiuorno

te cumbina guaie

e nun se sape ancora

quanno ‘a fernesce,

mentre l’anzia cresce

ogne ora ‘e cchiù.

Appena me riesce

me parte appena juorno

‘nzieme c’’o sole

ca pe miezo juorno

m’aggià gudè tutta Castiellammare

a Quisisana fino Puzzano,

senza lascià na via

ca ‘un aggio visto,

senza  nu saluto a chi sacc’io

si ancora m’’a trovo

nnante a me,  mmiez’’a via,

si ancora guaglione me ritrovo

‘ncoppo Scanzano, ‘ncoppo Mezapreta

ca po me vota arreta e me ne torno

comme a nu furastiero

a ro ne so’ venuto

a do’ stongo a mannarve nu saluto

pe nun me sentì sulo.

Gioacchino Ruocco

Ostia Lido 17.04.2020