Ogne ricordo … Inserita nella raccolta “Suspire ‘e miezejuorno”

Si uno ‘e chiste juorne trovo ‘o tiempo,

Castillemmare è ddoce pure a vierno,

piglio nu treno e torno.

‘A Villa o Lungomare, quatte passe

So nu ricordo ormaie d’’a giuventu.

E n’è passato ‘e tiempo!

Io m’arricordo n’anema ‘nnucente

Duie uocchie verde nnanze a nu mare blu.

Ma che te dico ? ‘O saie.

Ereme guagliune tutt’e dduie ,

mò lascianno perdere l’età, simmo

chello ca cchiù nun simmo.

T’astregno a mano ‘e vvote ‘int’’e penziere

e penzo a tutte ‘e sbaglie c’aggia fatto.

Ma a essere sincere

‘a luntananza nun è na malatia.

Te priva ‘e tutte chello ca tenive

C’ormaie te si scurdato

E mette a singo ll’anema, ‘a cuieta.

Trova na scusa va! Che le raccunte ?

Ch’è stata ‘a luntananza ?

Siente a me. Fatte nu giro e nun ‘ncuità

Ca ognuno tene già qualche penziero.

Fa comme è fatte aiere

chiede nutizie a qualche amico tuio.

Ca quanno ‘o tiempo passe ognuno penza

sultante ‘e fatte suie.

Ogne ricordo è nu male ‘e core.

E che ne faccio mò primme ca more

ca nun ricordo manco chi si tu!

Gioacchino Ruocco

Ostia Lido    24/01/2014

Inserita nella raccolta “Suspire ‘e miezejuorno”