Mò c’arriva l’estate…

Mò c’arriva l’estate

torna ‘o penziero ancora a chilli juorne

ca ce stevano fiche ammature

tuorno tuorno.

e mmennele rusate 

sempe cchiù sapurite.

‘O bbrito ‘e coppe ‘e mmure

faceva luce luce ‘o sole

mentre ‘e pparole erano poche

c’’o sciato me serveva pe correre

e zumpà pe dint’’e surche

e pe chiammà chi restava sotto.

‘E  mele annurche, ancora ncopp’’e ppiante,

sempe cchiù verde,

sembravano pensiere troppo triste,

e facce ‘e cammurriste.

‘O scisto quann’’a sera

faceva ‘a luce attuorno

fino a ca rummaneva

’a forza ‘e stà scetato.

‘O cane nnant’’a porta

guardava ‘a luna

e si ‘o ccarezzavo

muveva sulo ‘a cora

e me guaradava stanco pur’isso

‘e tutta na jurnata a correre e pazzià.

Mò c’arriva ll’estate

sarranno ati penziere,

juorne  ca nun saccio c’aggia fà!

Nu poco pe ll’età

e n’atu poco 

ca tengo tanta cose ancora ‘a sistemà.

Tirette chine ‘e parola a smerze,

penziere c’aggio perzo ncopp’e carte,

penziere nire, penziere scialacore,

penziere in cerca ‘e n’arte

pe nun chiagnere miseria,

ca tanta sere m’hanno tenuto scetato

fecennemo suffrì dint'a  nuttata.

Nun saccio comme è stato,

ma stongo ancora ccà

a chiagnere pe tte

ch’’e vvote me vuo’ bbene, 

‘e vvote no,

comme a jurnata ‘e iere,

comme è succieso ogge

ca ‘un te capevo cchiù.

Guaglione e ommo 

e cu nu core tanto…

me trovo ‘e vvote santo

senza sapé pregà.

Gioacchino Ruocco

Ostia Lido       08/06/2014

Inserita nella raccolta “Nu juorno comme a n’ato”