‘A signurina…
‘A dummeneca ‘e matina,
tutta vestuta a ffesta ‘a signurina
se faceva dduje passe
guardannese ‘e vetrine ancora aperte
e po’ p’’a villa jenne nnanze e arrete
fino a se stancà ma cchiù cuntenta.
Pigliava nu gelato d’’a Spagnuolo
e na guantiere ‘e pasta sule cannuole
sule p’’o pate ca nun diceva basta.
A mamma le piaceve ‘o dolce ‘e casa
e ‘o priparava na jurnata primma
‘nziemo a na vicina c’aiutava.
Era nata c’'o pate era anziano
E ‘a mamma na signora ‘e tarda età
e nisciuva, a essere sincere, s’aspettava.
Na femmena ca ce sape fà
cu tutte quante, trattanno ognuno
cu nu rispetto ca addò quann’essa passa
chioveno cunfietto cannellino
comme a chille ‘e Carrese o Surrentino.
E’ nu spettaculo ‘a signora Catarina
e ognuno l’accumpagna cu nu ciancio.
Criscette ‘a guagliuncella ‘int’’a vammace
cu nocche e nucchetelle ncapa e ncuollo.
Ata campà cient’anne! Ca Ddio
ve manno ‘o bbene ca vulite.
Diceva chiunque a canusceva.
Vuie site bella, chi sa quale marito ?
Ma ne passaie ‘e tiempo e fuie quanno
nun ce penzava cchiù c’accumparette
chillo ca po’ cu n’attimo facette
chello c’’a vita ‘e vvote nun vò fa.
Passaie qualche mese
tra cumplimente e vase.
E quanno ammore trase a poco a poco
appicce fuoco ca nun fernesce maie.
‘A mamma che s’’a guarda nun ce crede
e spera c''a guagliona, ‘a signurina,
nun fa passà cchiù tiempo e se ‘nnammora.
Tene nu core ch’è friccecariello
e va truvanno chello ca dice essa.
Pur’essa guarda, guarda e nun se nganna
ma ‘o punto a croce nun s’’o vò ‘mbarà.
Pe ogne ccose primma addà penzà
e po’ ce penza ancora primma ‘e fà.
Sta piccerella è na signurina
ca se sose matina
ma nun va maie ‘e pressa.
‘O pate s’accarezza cu ll’uocchie
e essa le dice sempe ‘a verita.
Nun ‘o mpapocchia maie, nun le piace.
Papà è papà e mamma n’ata cosa,
ca para na pupata e sonna ancora.
Chi sa a chi sonna, ma papà nun tremma.
Tene na flemma comme a n’ommo inglese.
Si te vò bbene ‘o ffà senza na scusa.
Se spegna dint’a ll’occhie ‘e Cuncettina
e nun ‘a perde ‘e vista nu mumento.
Che dì ancora? Ce faccio nu penziero
pe sta guagliona ca guardo e me nnammoro ?
O aspetto n’atu ppoco
ca s’appicce cchiù forte chesto ffuoco ?
Gioacchino Ruocco
Ostia lido 28/04/2015
Inserita nella raccolta “Ce steva na vota”
.jpg)
