E’ quase maggio

E’ quase maggio, ma ll’aria è ancora fredda!

Si chiove, chiove a vviento, sfrennesea

e nu mumento ‘e pace nun ‘o trove.

Si stienne ‘e panne è nu curro curro

c’’o viento n’atu ppoco se ne pporta.

‘E pporte sbatteno e haie voglia ‘e di: sta attiento!

E ll’aria se fa ‘e ggelo all’impruvviso.

‘E ppiante pure sbatteno tremmanno,

speranno ‘e nun muri p’’o troppo friddo

ca brucia ‘e ffoglie e ‘e scogne comme a nnoce.

‘O buono tiempo ormaje songo semmane

ca torna e s’arretira.

E io na lenza ‘e pace quanno ‘a trovo !?

Vulesse risciatà fore ‘o balcone,

e te sentì canta qualche canzone,

ma tu comme a ll’auciello freddigluso

ca sbatte 'e scelle pe se levà 'o nfuso

iesce e trase a dint’’a casa

tenenno ‘o core triste e senza sciato.

Che primmavera strana!

Eppure Giesù Cristo è gia risorto

e qualche piantulella ha miso ‘o sciore.

Si tu murisse proprio‘e chisti juorne

sarisse nfame cchiù dd’o tiempo niro.

Pe chesto io t’astregno dint’’e mmane

pe nun te fà fà comme ‘e llenzole,

sparpetià e senza na parola ca me resta,

senza nu suspiro che m’appiccia

ma sulo cu nu chianto dint’’a lluocchie

c’’o tiempo trova ‘o tiempo ‘e m’asciuttà

primma ca succere statu ‘mpiccio.

Gioacchino Ruocco

Ostia Lido            28/04/2015

Inserita nella raccolta “Ce steva na vota”