'Onna Culomba

Eravamo a Castellammare di Stabia, nell'ingresso della casa.

Mia suocera al telefono - Acquarello - G. Ruocco

‘Onna Culomba..

Na casa grossa

quant’era gruosso ‘o munno.

A nnanze nu rummore

fino a dint’’a notte,

arreto ‘e vvoce ‘e trene

ogne mezora,

nu votta votta

e nu fracasso ‘e fierro

ch’era ‘a vita d’’a casa

ca quanno s’addurmeva

era nu vaso dint’’o suonno

chillo ca danno ‘e mamme

'e criature.

D’’o mare a duie passe

appena nu suspiro

quanno se calmava a via

ogne tanto.

‘O sole te spaccava ‘e cerevella

e ‘a pella se faceva nera nera.

'E vvote na bufera ‘e maletiempo

e ate na tempesta ‘e primmavera

cagnavano a jurnata

sceppannate

d''e mmane
chello ca tenive ‘e cchiù caro.

Ma Onna Culomba no,

nun se smuveva.

Era ‘a primma a scetarse,

ma ‘e vvote rummaneva

cu ‘e piere nterra

fino 'o juorno appriesso

o cu nu libbro

o cu ‘e ffiglie attuorno

a cuntà fatte ‘e na vita sana

o comme cucinà na mulignana,

nu piatto ‘e pasta,

na pizza, na lasagna.

Era scetata e nun teneva suonno

e s’addurmeva sulo si vuleva,

si ‘o tiempo era tiempo pe durmì.

Si no sunnava cu ll’uocchio ca redeva

penzanno a tanta cose

ch’’e vvote te diceva

o t’eva dicere, ma quanno po’ vuleva.

Gioacchino Ruocco

Ostia Lido                  10/05/2015

Inserita nella raccolta “Ce steva na vota…”