Gelusia

Me sto perdenno

appriesso a nu pensiero

ca fin’a iere nun penzavo ‘e avè.

E t’’o dico cu n’animo sincero

ca nun so stato maie geluso ‘e te.

Pe me tu si na femmena

comme i’ songo n’ommo

diverse pe fa ‘e stu munno

nu triato overo.

Tu tiene nu pensiero

e io ne tengo n’ato

pe chesto me songo ‘nnammurato ‘e te.

So’ fatto ‘e na manera

e voglio sta cu te

senza male penziere.

Te voglio guardà ‘nfaccia

sicuro ‘e guardà sempe ‘a stessa femmena

ca tutt’’e juorne

trovo affianc’a me.

Ma ogge a che pienze

ca nun m’è ditto ancora na parola ?

Si ‘ncielo ce sta ‘o sole,

ma sento sule tronele ?

Si nun ‘a penzo sempe comme a te

Nun te sto danno ‘o sfratto.

Te voglio bbene sempe

ma nun me fa penzà

a chello ca nun voglio.

‘O mare è chino ‘e scoglie

pur’io pozzo affunnà.                                                                   

   

Ostia L. 2 maggio 2009 ore 7.30

La poesia è inserita nella raccolta ‘E primma matina

Pubblicta inserita in quella più ampia

dal titolo “Turnanno arreto “,

edita a Roma nel 2010 

presso il Gruppo editoriale L'Espresso