Stanotte ‘int’a sta casa nun se dorme…

Stanotte ‘int’a sta casa nun se dorme.

St’aneme ‘e Ddio

Nun fanno ca chiagnere e strillà.

Me sosse e me ne piglio uno ’nbraccio,

chill’ato ‘o tene ‘a mamma, c’aggia fa’.

Pure sta vota ce fanno fà matina,

m’’o sente ca nun vaco a faticà.

Aggio cagnato turno già tre vote,

ma comme faccio a stà scetato

si ‘ncuorpo dorme e ll’uocchie mieze chiuse.

L’aggio già chiesto tanta vota scuse

ca nun saccio che dicere

si pure stammatina m’avesse capità.

Doppo nu quarto d’ora ‘e sbattemiente

se n’è addermuto uno

e io guardanno ‘a luna ‘ncielo

me metto a suspirà.

Chill’ato se zuca ‘a buttigliella,

‘o latte nun avasta,

fra poco ce vo’ ‘a pasta.

‘Npruvvisamente fernescesce ‘a jacuvella,

ma ‘o riesto d’’a nuttata è peccerella.

A me m’avasta na mezzora ‘e suonno,

ma primmo ca m’addormo

sento attuorno n’aria ‘e felicità.

Muglierema me tene ‘a mano astrenta

e cu chell’ata sta a cunnulià.

Duorme, Maurì, ca ce penz’io

si succede ancora,

ma ‘a miez’’a via arriva già ‘o rummore

‘e chille ca già vanno a faticà.

‘O core mio, invece, ca penza e penza…

ormaie nun po’ sta cchiù senza

chesta felicità.

E mentre penza s’addorme

c’’o core chino ‘e suonne.

Sulo nu quartedore e  po’ se sosse n’ata vote.

Ll’ere sembrato ‘e sentere

nu culpettino ‘e tosse.

Cu ‘e primme frische…

Ma nun è niente e torna a ripusà.

Gioacchino Ruocco

                       Ostia lido 20/09/2009



La poesia è inserita nella raccolta ‘E primma matina

Pubblicata in quella più ampia

dal titolo “Turnanno arreto “,

edita a Roma nel 2010