Si stesso a penzà sempe…

Si stesso a penzà sempe

a chello ca tu dice

avesse cagnà vita

tutt’’e juorne.

Ma cu ll’amice, ‘o saje,

ce vo’ pacienza

c’’a vita senza amice

nun è niente.

Tu me vuò dà cunziglie

e i’ nun ‘e ssente.

So’ impertinente

e faccio a modo mio.

Che vuò ca io faccio

chello ca vuò tu ?

Ma si si ‘o primmo

ca faie tutt’’o cuntrario

‘e chello ca me dice

‘o juorno primmo

ca parimme ‘e vvote

‘a raspa e ‘a limma.

Tu allimme e io raspo

ma tu c’’o naspro

cagne sapore ‘e ccose

e vuò fa doce amaro

pure l’acqua d’’o mare

ca nun cagne maie,

manco si accire

comme a duie uocchie nire

ca me stanno attuorno.

Si fosse a te

io me levasse ‘a tuorno

almeno pe nu juorno

mentre ripiglio sciato

e mette ‘e ccose in chiaro

pecchè l’ammore è ammore

e tu comme a nu frato.

Gioacchino Ruocco

Ostia lido              30/05/2014

Inserita nella raccolta “Nu juorno comme a n’ato”