Tu t'abbracciava ll'ate...

Tu t'abbracciava ll'ate

ma t'abbracciava mme

ca stevo ‘mmiez’a lloro

e io me cunzulavo

sultanto a te vedé,

a te sentì vicino

mentre evemo perdenno

'o tiempo 'a ccà e a llà

pe ce scurdà

d''e guaie  e d''a fatica

ca stanca o accire

cu tutte 'e mmire

ca se porta appriesso.

Te voglio bbene 'o stesso,

nun ne pozzo fà a mmeno,

t’aggio vuluto bbene

appena t’aggio visto

comm’uno d’’a famiglia

ca si me giro arreto

e nun te trovo cchiù

perdesso ‘a ggiuventù

addevetanno vecchia

 ‘a nu mumento a n’ato.

 Chi sa si tu ‘o capisce

 ca ‘e te so ‘nnammurata ?

 Pe na serata ?

 Ma no pe tutt’’a vita.

 Tieneme abbracciata

 e nun me lassà cchiù.

 Gioaccino Ruocco

 Ostia lido        21/08/2014

 Inserita nella raccolta “ Ce steva na vota…”