Quatte passe

Stongo ‘e casa

addó tu stive ‘na vota

e tu staie

addò i’ stevo nu juorno.

Ma sempe ccà attuorno

addò stammo  nuie ogge,

fore a sta loggia

addò ‘o tiempo passava

cchiù allero

cchiù ‘e corza

e ce vuleva na forza

pe me ne purtà.

Pazziavo e pazzianno

nun m’accurgevo

c’’o tiempo passava

e lasciarte

era n’arte

ca straziave stu core.

Te guardavo speruta

e turnanno turnanno

cuntavo ‘e minute

e ‘a nuttata era nu muorzo

o era nu puzzo

‘o cchiù futo

ca si me scetavo

restavo scetato

fino a matina.

Stongo ‘e casa

addò tu stive na vota

e sta loggia

stà a stessa distanza

ma int’’o tiempo c’avanza

te guardo e te veco

comme a quann’iro guaglione

cue stesse ragione

cu ‘e stesse penziere.

Pare aiere,

ma ‘e tiempo ne passe.

Quatte passe

te restano ‘a fà,

ma si passa chest’ata stagione

nun ‘o saccio che faccio

si aspetto, si parte

e si ‘o faccio cu chi.

Gioacchino Ruocco

Inserita nella raccolta “  Ce steva na vota… ”

Ostia Lido       24/06/2015