Me ne vogl’i’ a Surriento.

Me ne vogl’i’ a Surriento appena tengo ddoie llire e me vulesse truvà na guagliona cu ll’uocchie nire e senza ‘nfamità. Sotto a l’albero ‘e nu ciardino me voglio arrepusà cu ‘addore  d’‘e llimone ‘int’a ll’aria, arance e mandarine ca scetanneme me pare ‘e stà a sunnà. Me ne vogl’i’ a Surriento ‘nponte ‘o Capo pe ragiunà c’’o mare e po’ c’’o viento e pe capì ‘int’’o core che ce tengo, chi gli ‘o fa fa e s’agità e fà tempeste quanno ‘nterr’a na marina l’onne s’addormeno quiete senza turnà cchiù arrete tanta vota. Me ne vogl’i’ a Surriento pe sentì ‘a voce d’’o viento quanno passa ‘a na fronne a n’ata e sbarea ‘nzieme all’arillo e dint’’e capille é na mano leggera ca m’accarezza levanneme ‘a cuollo tutt’‘e tristezze ca m’aggio pigliato. Me ne vogl’ì’ a Surriento pe nun me scurdà ch’esisto pur’io quann’accummience  c’’a stessa zampogna. Quann’’o tiempo se ‘ngrogna   e po’ chiove addo trovo ‘o purtone pe m’arreparà? Me ne vaco a Surriento e te dico addò vaco ca si vuò venì basta ca scinne d’’o treno  e me truove. Me ne so juto a Surriento pe t’aspettà no pe fuì ‘ncap’’o munno, ma pe capì si ancora te voglio, si ancora me vuò.

Ostia Lido - 25/04/2010

La poesia fa parte della raccolta ‘E primma matina"

inserita in quella più ampia

col titolo “Turnanno arreto “,

edita a Roma nel 2010 

presso il Gruppo editoriale L'Espresso