Quann'ero guaglione

                                 
                                      Nu quaderno 'e quann'ero guaglione
                                      m'è turnato 'int''e mmane
                                      comme a n'anema perza
                                      dint'e bbanche d''a scola.

                                      Nun c'è na parola ca conta nu fatto.
                                      Mazzarelle
                                      e po' lettere astratte,
                                      fore d''o munno.
                                      Na o ca tonna 'nn è maie
                                      e na a ca nun dice maie niente.
                                      E pareva ogne ccosa affatata,
                                      comme 'o viento
                                      ca me sfutteva
                                      girannemo 'o foglio
                                      quanno sbagliavo.
                                      'O ciuccio 'int''o vico arragliave
                                      e io cercavo e fà tonna na o
                                      c'arrubbava 'o tiempo a pazzia.
                                      Mammà me guardava
                                      cu tanta pacienza,
                                      'a pacienza ca tenene ' e mamme
                                      ma 'o penziero curreva luntano
                                      chi 'o ssa che sperava pe mmè !
                                      'O cazone vulevo nu punto
                                      a na pezza che s'era scusuta
                                      e 'a tracolla l'avevo spezzata
                                      a jucà cu ll'ati guagliune.
                                      Ma che munno!
                                      Me l'ero scurdato.
                                      N'ata vita quann'ero guaglione:
                                      'o cazone, 'a tracolla, na scolla,
                                     tanta juoche
                                     ca mo nun se fanno.
                                     Menu male ca l'aggia astipato
                                     stu quaderno.
                                     Quanta penziere affatate!
                                     Era aiere però.
                                     Io so nato....
                                     mo ero guaglione,
                                     pazziava 'a staggione
                                     abbasci' a marina,
                                     'int''a terra d'a nonna
                                     e 'o nonno guardava
                                     e fumava na pizza
                                     e 'e vvote, quanno parlava:
                                     - Resenà, st'attiento 'o guaglione.

                                                   Gioacchino Ruocco
                                                   
                                                   Ostia Lido    14/03/2014
                                                   Inserita nella raccolta "Suspire 'e miezejuorno"