Quanno t’aizaste ‘a vunnella

Quanno t’aizaste ‘a vunnella

e me faciste vedè ‘o paraviso ‘nterra

i’ me scurdaie ‘o munno

ca steve attuorno a me.

                

‘A vita me parette n’ata cosa

e dint’a ll’aria sentette

n’addore ‘e rose

comme a nu ciardino ‘e paraviso.

Sentette n’incantesimo

e dint’’a capa comme a na canzone

e tutt’attuorno ‘a vita sospirava

comme fa stu core mio pe te.

Nannì, si nun t’avesse canisciuta,

i’ nun sapesse comm’è doce ‘a vita

e ogne vota ca me guardo attuorno

te cerco comme a ll’aria sapurita.

E st’uocchie nire ca tu tiene ‘nfronte

me tenene sempe cchiù astrinte a te

pe cchesto ‘o core mio è sempe pronte

qualunque cose vaie truvanno ‘a me.

Quante si scemo, m’ha ditto qualcheduno

ma tu addò campe ‘nterra o ‘ncopp’’a luna ?

‘E femmene so’ tutte quante ‘e stesse

pecchè continue ancora a te fa fesso ?

Ma io te voglio bene e si so’ scemo,

che me ne ‘mporta.

I’ quanno torno a casa e arape ’a porta

i’ songo ‘o cchiù felice ‘e te truvà.

Te guardo e penzo, ma che ce penzo a fa:

‘a vita è una sola e stamme ancora ccà.

Ognuno ‘e nuie vo’ vencere,

ma perdere che fa,

si perdere cu te è na felicità.

‘O pegno è sempe ‘o stesso:

chi vence o perde sempe adda pavà:

Tu pave a me e io te pavo a te.

Ma chestu nun ‘e perdere è sule pazzià,

Na scusa ancora pe te puté vasà.

Finita di scrivere il 20/09/2009 alle ore 8,30   - Ostia Lido

La poesia è inserita nella raccolta ‘E primma matina

Pubblicata in quella più ampia

dal titolo “Turnanno arreto “,

edita a Roma nel 2010